Токаев принял генерального прокурора
Мемлекет басшысы Қасым-Жомарт Тоқаев Бас прокурор Берік Асыловты қабылдады. Президент елдегі заңдылықтың жай-күйі және қадағалау қызметінің басым бағыттары бойынша жұмыс қорытындылары туралы есепті тыңдады, деп хабарлайды Aspa.info Ақорданың баспасөз қызметіне сілтеме жасай отырып.
Қасым-Жомарт Тоқаевқа құқықтық көмек көрсету және шетелде жасырынған қылмыскерлерді іздестіру жөніндегі халықаралық ынтымақтастықтың нәтижелері туралы баяндалды. Бірқатар резонансты қылмыстық істер бойынша күдіктілер ұсталып, сот төрелігін жүзеге асыру үшін Қазақстанға қайтарылды.
Мемлекет басшысы активтерді қайтару мәселелері бойынша беделді халықаралық ұйымдармен, оның ішінде Еуропа Кеңесімен, Интерполмен, ЭЫДҰ және ЕҚЫҰ-мен өзара түсіністікке қол жеткізілгені туралы хабардар етілді.
Берік Асылов хабарлағандай, ел экономикасына 2,7 триллион теңге салған 220 инвесторға құқықтық көмек көрсетілді. Осы жұмыстың нәтижесінде инвесторлардың мемлекеттік билік институттарына сенімінің деңгейі артады. Кездесу барысында өңірлердегі тікелей инвестицияларды тарту бойынша істердің нақты жай-күйі қаралды.
Президентке елдегі криминогендік жағдай және қылмыстық-құқықтық саладағы азаматтардың конституциялық құқықтарын қамтамасыз етуге бағытталған шаралар туралы есеп берілді.
Кездесу қорытындысы бойынша Қасым-Жомарт Тоқаев елдегі заңдылықты одан әрі нығайту, азаматтарды, соның ішінде кәсіпкерлерді қылмыстық элементтерге қол сұғушылықтан қорғау жөнінде шаралар қабылдауды тапсырды.
Мемлекет басшысы инвестициялық жобаларға қатысты уәкілетті органдардың шешімдері бойынша «прокурорлық сүзгіні» тиімді пайдаланудың маңыздылығын атап өтті. Бұл ретте ол аталған органдардың тартылатын инвестициялар туралы деректерінің дұрыстығы үшін бақылауды және жауапкершілікті күшейту қажеттігіне назар аударды.
Президент сондай-ақ шетелге заңсыз шығарылған активтерді іздеуге және қайтаруға бағытталған заманауи технологиялардың кең спектрін қолдану қажеттігін атап өтті.
