Қазақстандық бітімгершілер ротасы Голан биіктігіне жетті, деп хабарлайды AdiletTV Қазақстан Қорғаныс министрлігінің баспасөз қызметіне сілтеме жасай отырып.
Қарулы күштердің әскери қызметшілері Қазақстан аумағынан Сирияның астанасы Дамаскіге ұшып келіп, автомобиль техникасымен Фауар бітімгершілік базасына жетті.
Ресми деректер бойынша, базаның орналасқан жеріне қарсы тараптар арасында оқ атуды тоқтату режимін қолдау жөніндегі міндеттерді орындауға арналған әскери техника мен мүлік жеткізілді. Қазақстандық жасақ 139 әскери қызметшіден тұрады.
Ұлттық контингенттің жеке құрамы қазірдің өзінде орналастыру және жайластырумен айналысуда. Рота штабы істерді қабылдау және «БҰҰ бөлінуді бақылау жөніндегі күштері» миссиясы қолбасшысының резерв ротасының функционалын нақтылау бойынша жұмыс жүргізеді.
«Бәрі жоспар бойынша жүріп жатыр. Жексенбі күні жеке құраммен бітімгершілердің алдында тұрған міндеттерді ұстау бойынша сабақтар өткіземіз, ал дүйсенбі күні олардың тәжірибелік пысықтауын бастаймыз «, — деп нақтылады қазақстандық бітімгершілік контингенттің командирі подполковник Жигер Аипов.
Қазақстанның Қорғаныс министрлігі бітімгершілік миссияларға қатысу — әскери қызметшілердің жауынгерлік дағдыларын арттыруға ықпал ететін оқытудың маңызды компоненті екенін атап өтті.
«Бұл миссияның ерекшелігі — дербестік. Бұрын біздің бітімгершілік контингентіміз басқа елдердің бөлімшелерінің құрамында қызмет өткерген. Бөлімше жауаптылық аймақтарында патрульдеу, тосқауылдарды ұйымдастыру, бітімгершілік базаны күзету және бейбіт келісімдердің сақталуын қамтамасыз ету үшін қажетті броньды дөңгелекті машиналармен, КамАЗ-дармен, шағын автобустармен және жол талғамайтын көліктермен жарақтандырылған «, — делінген Қазақстан Қорғаныс министрлігінің баспасөз қызметінің хабарламасында.
«Әкем ұшып кетті». Қазақстандық бітімгершілерді Таяу Шығысқа қалай шығарып салдық
Естеріңізге сала кетейік, 14 наурызда Tengrinews.kz фототілшісі Тұрар Қазанғапов Алматыдағы 28 гвардияшы-панфиловшылар атындағы саябақта бітімгершілік контингентін Таяу Шығысқа шығарып салу рәсімін түсірген болатын. Бұл туралы фоторепортажда толығырақ.
Айта кетейік, Қазақстанның бітімгершілік миссиясы туралы ресми түрде 2024 жылдың 19 қаңтарында белгілі болды. Сол кезде Президент Қасым-Жомарт Тоқаев Парламент палаталарының бірлескен отырысында депутаттардың қарауына қазақстандық бітімгершілерді Таяу Шығыс пен Африка елдеріне жіберу туралы ұсыныс енгізген болатын.
Бұған дейін Қазақстанның қорғаныс министрі Руслан Жақсылықов қазақстандық әскери қызметшілер Таяу Шығыс пен Африкаға соғысқа бармайтынын мәлімдеген болатын.
«Бітімгершілік функциялар мен міндеттерді орындау кезінде армия соғысқа үйренбейді. Біз бірінші кезекте алдымызға әлемдік тәжірибені зерттеу міндетін қойып отырмыз. Негізгі міндет — бейбіт миссияларды сақтау, қарсы тараптарды ажырату және басқалары. Бұл соғыс емес. Бұл ұрыс қимылдары емес «, — деді Жақсылықов.
