ПЕДАГОГТЕРДІҢ ҚҰҚЫҚТАРЫН ҚОРҒАУ – БАСТЫ НАЗАРДА!
Киелі шахарда орналасқан №34 жалпы білім беретін жайлы мектепте білім саласы қызметкерлерінің құқықтарын қорғауға арналған маңызды семинар өтті. Семинар Қазақстандық оқу-ағарту, ғылым және жоғары білім қызметкерлері салалық кәсіподағы мен ҚР Оқу-ағарту министрлігінің бірлескен әлеуметтік әріптестігі аясында ұйымдастырылды. Бұл жиында педагогтердің еңбек құқықтарын қорғау, әлеуметтік жағдайын жақсарту және білім беру саласындағы маңызды мәселелер кеңінен талқыланды.
Семинар барысында Жандос Шайдұллаұлы өңірдегі ұстаздардың еңбек жағдайларын жақсарту, еңбекақы төлеу жүйесін әділ ету және мұғалімдердің құқықтық сауаттылығын арттыру мәселелеріне ерекше назар аударды. “Ұстаздардың еңбегі лайықты бағалануы керек. Кәсіподақтың басты міндеті – олардың құқықтарын қорғап, әлеуметтік жағдайларын жақсартуға ықпал ету. Біз педагогтерге қажетті құқықтық көмек көрсетіп, еңбек жағдайларын жақсарту бойынша нақты жұмыстар атқарып келеміз”, – деді Жандос Шайдұллаұлы.
Семинарда көтерілген негізгі мәселелер:Педагогтерді аттестациялау жүйесіне енгізілген өзгерістер. Білім беру ұйымдарының басшыларын тағайындау қағидалары. Мұғалімдердің жалақысы, қосымша төлемдер мен ынталандыру үстемелері. Ұстаздардың еңбек құқықтары мен әлеуметтік кепілдіктерін кеңейту. Екі кезеңге жоспарланған жиынға 500ге жуық Түркістан облысына қарасты білім ошақтарының басшылары, есепшілер мен білім бөлімінің қызметкерлері қатысты.
Семинар аяқталған соң да қатысушылар көкейлеріндегі сұрақтарын қою мүмкіндігіне ие болды. Айгүл Мұқашева, Айман Дүйсембаева және Райхан Қыдырбаева ұстаздармен еркін пікір алмасып, әр сұраққа жан-жақты жауап берді.
Айгүл Мұқашева – кәсіподақтың білім беру қызметкерлерінің әлеуметтік құқықтарын қорғаудағы рөлі мен алдағы жоспарларын түсіндірді.
Айман Дүйсембаева – педагогтерді аттестациялау және жаңа енгізілімдер туралы нақты ақпараттармен бөлісті.
Райхан Қыдырбаева – ұстаздардың еңбек құқықтарын қорғау және заңнамалық өзгерістер бойынша кеңес берді. Олардың әрқайсысы өз саласын жетік меңгерген білікті мамандар екенін тағы бір мәрте дәлелдеп, педагогтердің сұрақтарына кәсіби тұрғыда жауап қайтарды. Мұндай ашық диалог мұғалімдер үшін үлкен маңызға ие болып, олардың құқықтық сауаттылығын арттыруға септігін тигізді. Айта кетейік дәл осындай семинарлар Атырау, жетісу, Қарағынды облысы және Шымкент қаласында жүргізілді.
