Шымкент қаласында жыл басынан бері 200-ден астам кәсіпкер әлеуметтік маңызы бар тауарлардың бағасын негізсіз көтергені үшін жауапкершілікке тартылды. Олардың 15-і – ет бағасына байланысты. Бұл туралы қалалық ауыл шаруашылығы басқармасы хабарлады.
Ведомствоның мәліметінше, әлеуметтік маңызы бар азық-түлік бағасының сақталуын бақылау мақсатында жүздеген сауда нүктелері тексерілген. Айта кетейік, сиыр етінің (жауырын-кеуде бөлігі, сүйегімен) бағасы бақылауға алынған 19 әлеуметтік маңызы бар азық-түлік тізіміне кіреді.
«Бүгінде Шымкентте шамамен 60 әлеуметтік сауда нүктесі жұмыс істейді. Сонымен қатар апта сайын ауыл шаруашылығы жәрмеңкелері өткізіледі. Бұл жәрмеңкелерде сүйегімен сатылатын сиыр еті тұрақты бағамен — килограммы 3200-3300 теңгеден сатылады. Өнімдер Түркістан облысындағы мал шаруашылығы фермаларынан тікелей жеткізіледі», — деді басқарма басшысы Талғат Мекамбаев.
Ол сондай-ақ таза еттің (мякоть) бағасы реттелмейтінін атап өтті.
Басшының айтуынша, «Каскасу-С» және «Бәйтерек» шаруа қожалықтарымен жасалған келісімшарттар аясында сиыр етінің (сүйегімен) сату бағасы – 2620 теңге/кг. Сонымен қатар, «айналым схемасы» механизмі арқылы «Magnum» және «Грамад» сауда желілерімен келісімшарттар жасалған, бұл еттің (жауырын-кеуде, сүйегімен) 2590 теңгеден сатылуын қамтамасыз етіп отыр.
Ауыл шаруашылығы басқармасы нарықта сиыр етінің ең жоғарғы коммерциялық бағасы 3800-4000 теңге/кг екенін де атап өтті. Алайда кейбір сауда орындарында баға тұрақты күйінде сақталып отыр. Жеке сауда нүктелеріндегі бағаның өсуін шенеуніктер маусымдық сұраныстан бастап, жем-шөптің қымбаттауы мен экспорттың артуына дейінгі бірқатар факторлармен түсіндіреді. Дегенмен қалада ет тапшылығы немесе дүрлікпе жоқ, — деп атап өтті басқарма басшысы. Әкімдік тұрғындарды әлеуметтік маңызы бар өнімдердің бағасы бақыланатын және реттелетін сауда нүктелеріне баруға шақырды.
Спросить ChatGPT
