Қазақстанның үшінші мегаполисі – Шымкент қаласында қуаттылығы 500 мегаватт болатын заманауи парогазды электр станциясы салынып жатыр. Бұл жоба еліміздегі энергетикалық қауіпсіздікті нығайтуға және өңірлік инфрақұрылымды жақсартуға бағытталған. Аталған жобаны Түркияның «Aksa Energy» атты ірі энергетикалық компаниясы жүзеге асыруда. Жалпы инвестиция көлемі шамамен 700 миллион АҚШ долларын құрайды. Жобаның ерекшелігі – ол 100% шетелдік қаржыландырумен жүзеге асырылады, яғни мемлекеттік бюджеттен тікелей субсидия қарастырылмаған. Дегенмен, мемлекет тарапынан әкімшілік және инфрақұрылымдық қолдау көрсетілуде – бұл жер телімін бөлу, су, жарық, жол секілді инженерлік инфрақұрылымды тарту жұмыстарын қамтиды. Электр станциясы электр қуатымен қатар жылу мен ыстық суды да өндіреді. Бұл Шымкент қаласы үшін аса маңызды, себебі жыл сайын қала халқының саны өсіп келеді, ал энергияға деген сұраныс арта түсуде. 2030 жылға қарай Шымкенттің энергияға деген қажеттілігі 545–550 МВт көлемінде болады деп болжануда. Демек, бұл жоба қаланың негізгі сұранысын толықтай жаба алады. Құрылыс кезеңінде шамамен 1000 жұмыс орны ашылады, ал станция іске қосылғаннан кейін 200-ге жуық адам тұрақты жұмысқа орналасады. Бұл жергілікті халық үшін жаңа табыс көзі мен әлеуметтік тұрақтылықтың артуына ықпал етеді.Экологиялық тұрғыдан алғанда, парогазды технология көмірмен жұмыс істейтін станцияларға қарағанда анағұрлым таза. Оның пайдалы әрекет коэффициенті (КПД) – 55–60% аралығында, яғни энергияны аз шығынмен өндіруге мүмкіндік береді. Сонымен қатар, атмосфераға бөлінетін зиянды заттардың көлемі едәуір азаяды. Экономикалық жағынан бұл жоба Шымкент үшін өте тиімді. Біріншіден, бұл – энергия импортына тәуелділікті азайтады. Екіншіден, ішкі нарықты тұрақты әрі арзан энергиямен қамтамасыз етеді. Үшіншіден, жергілікті бюджетке түсетін салықтар мен төлемдер есебінен қала инфрақұрылымын әрі қарай дамытуға мүмкіндік береді. Қорытындылай келе, аталған жоба 500 МВт қуаттылықтағы парогазды электр станциясы – бұл Шымкенттің әлеуметтік-экономикалық дамуына серпін беретін, экологиялық тұрғыда тиімді, әрі инвестициялық тартымдылығы жоғары инфрақұрылымдық жоба. Ол өңірдің тұрақты өсуіне, халықтың өмір сүру сапасын арттыруға және еліміздің энергетикалық тәуелсіздігін нығайтуға үлкен үлес қосады деп сеніп білдіреміз, соған нақты нәтижемен жұмыс жасалып жатыр.
Шымкент қаласындағы 500 МВт парогазды электр станциясы: қаржылық және экономикалық тиімділігі туралы
