Соңғы жылдары Шымкент қаласында өнеркәсіптік өндіріс айтарлықтай қарқынмен дамып келеді. Қала экономикасының жетекші бағыттарының бірі ретінде индустриялық сектор жүйелі түрде кеңейіп, жаңа өндіріс орындары ашылуда. Осы серпінді дамуға байланысты қолданыстағы индустриялық аймақтар аумағы тарлық етіп, жаңа жобаларға қосымша жер телімдері қажет болуда. Бұл жағдай қаланың жаңа индустриялық аймақтарын құруды және бұрыннан барларын кеңейтуді күн тәртібіне шығарып отыр. Қазіргі таңда «Оңтүстік» арнайы экономикалық аймағы мен «Жұлдыз» индустриялық аймағын кеңейту жұмыстары белсенді жүргізілуде. Бұл екі аймаққа қосымша жалпы көлемі 330 гектар жер телімін мемлекет мұқтаждығына қайтару көзделген. Осы мақсатта бүгінде 288 гектар жер мемлекет меншігіне өтті, ал қалған 42 гектар бойынша бағалау жұмыстары мен сот процестері әлі де жалғасуда. Бұл — күрделі әрі ұзақ мерзімді процесс, алайда индустриялық жобалардың сәтті жүзеге асуы үшін қажетті алғышарттардың бірі болып саналады. Жер телімдері толық қайтарылғаннан кейін, инженерлік инфрақұрылым жүйелерін жобалау және салу кезеңі басталады. Бұл кеңейту жұмыстары инвестиция тартуға, жаңа өндірістік кәсіпорындарды орналастыруға және жұмыс орындарын ашуға үлкен серпін бермек. Бұрынғы жобалардан көріп отырғанымыздай, әрбір жаңа зауыт жүздеген, кейде мыңдаған адамды жұмыспен қамтуға мүмкіндік береді. Сонымен қатар, бұл жобалар қаланың салық түсімдерін арттырып, жергілікті экономиканың тұрақты өсуіне ықпал етеді. Жаңа индустриялық аймақтар құру жұмыстары да назардан тыс қалмаған. Қазіргі таңда Шымкент қаласының оңтүстік-батыс бөлігінде көлемі 1 076 гектарды құрайтын жаңа индустриялық аймақ салу көзделуде. Бұл жаңа аймақ металлургия саласындағы жобаларға мамандандырылатын болады. Себебі металлургия — жоғары технологияларды, білікті кадрларды және қуатты инфрақұрылымды қажет ететін, бірақ сонымен бірге ел экономикасына елеулі пайда әкелетін стратегиялық сала. Жаңа аймақтың тұжырымдамасы әзірленіп, қала әкімдігінің қаулысы қабылданды. Келесі кезеңде энергетика және инфрақұрылымды дамыту басқармасы кәсіпорындардың инфрақұрылымға қосылу нүктелерін анықтап, техникалық жобалауды бастамақ. Сондай-ақ бұл аймақ үшін де жер телімдерін мемлекет меншігіне қайтару жұмыстары басталып кетті. Жобаның тиімділігі үшін барлық инженерлік инфрақұрылым — электр, су, газ, кәріз жүйелері, жол және теміржол қатынастары алдын ала шешіліп, сапалы түрде жүзеге асырылуы тиіс. Бұл — болашақ инвесторлар үшін сенімді орта қалыптастырудың кепілі. Жаңа аймақтардың ашылуы тек Шымкент қаласының ғана емес, бүкіл өңірдің өнеркәсіптік және экономикалық әлеуетін арттырады. Жаңа индустриялық аймақтар ішкі нарықты сапалы отандық өніммен қамтамасыз етуге мүмкіндік береді. Сонымен қатар, экспортқа бағытталған өндірістердің ашылуы Қазақстанның сыртқы сауда байланыстарын нығайтып, ұлттық экономиканы әртараптандыруға үлес қосады. Мұндай ауқымды бастамалар Шымкенттің өнеркәсіптік және логистикалық хабқа айналуына жол ашады. Қала тиімді көлік желілері, заманауи инфрақұрылымы және өндірістік базасы арқылы Орталық Азия нарығына шығу үшін тиімді платформа бола алады. Осы мақсатта индустриялық аймақтарды кеңейту — стратегиялық маңызы бар міндет болып қала бермек. Қорытындылай келе, Шымкент қаласының индустриялық дамуы тек бүгінгі күннің емес, елдің болашағына бағытталған нақты қадамдармен жалғасып жатыр. Жаңа аймақтар құру, қолданыстағыларды кеңейту және инфрақұрылыммен қамту – бұлардың барлығы біртұтас жүйені құрап, қаланы еліміздегі өндірістік алпауыттардың біріне айналдыру мақсатына жетелейді. Ал бұл, өз кезегінде, халықтың әлеуметтік жағдайына, жұмыссыздық деңгейінің төмендеуіне және жалпы экономикалық өсімге оң әсерін тигізетіні сөзсіз.
Жаңа индустриялық аймақтар құру және қолданыстағыларды кеңейту жұмыстары
