Қазақстан Республикасы халықаралық аренада бейбітшілік пен тұрақтылықты нығайтуға бағытталған сыртқы саясатымен танылып келеді. Соның айқын дәлелі ретінде Армения мен Әзербайжан арасындағы қарым-қатынасты қалыпқа келтіру жолындағы соңғы дипломатиялық қадамдарды атауға болады. 2025 жылғы 21 қазанда Тбилиси қаласында өткен V «Жібек жолы» халықаралық форумында Армения Премьер-министрі Никол Пашинян екі ел арасындағы өзара түсіністікке бағытталған маңызды уағдаластықтар жөнінде мәлімдеме жасады.
Атап айтқанда, Никол Пашинян Әзербайжан Президенті Ильхам Әлиевтің Әзербайжан аумағы арқылы Армения бағытына қатысты транзиттік шектеулерді алып тастау туралы шешімін жоғары бағалады. Оның айтуынша, бұл шешім аймақтық экономикалық байланыстарды жандандырып қана қоймай, екі ел арасындағы сенімді арттыруға және ұзақмерзімді бейбітшілікке жол ашатын маңызды қадам болып табылады.
«Бұл — аса маңызды мәлімдеме. Мен Әзербайжан Президентіне осы қадамы үшін ризашылығымды білдіремін», — деп атап өтті Армения Үкіметінің басшысы.
Сонымен қатар, Никол Пашинян аталған келісімге қол жеткізуде Қазақстан Республикасының Президенті Қасым-Жомарт Тоқаев пен Грузия Премьер-министрінің атқарған делдалдық рөліне ерекше тоқталды. Оның айтуынша, тараптар арасындағы өзара сенімді қалыптастыруда және келіссөздер процесін ілгерілетуде осы елдердің көшбасшылары маңызды үлес қосты.
«Мен Қазақстан Президентіне және Грузия Премьер-министріне осы келісімді жасауға қосқан үлесі үшін алғысымды білдіремін», — деді ол.
Бұл жағдай Қазақстанның өңірлік және халықаралық деңгейдегі беделін тағы бір мәрте айқындады. Елдің теңгерімді, бейтарап әрі сындарлы сыртқы саясаты күрделі геосаяси жағдайда да диалог пен келісімге жол табуға мүмкіндік беріп отыр. Қазақстанның бітімгершілік бастамалары Оңтүстік Кавказдағы тұрақтылықты нығайтуға, өзара ынтымақтастықты дамытуға және бейбіт қатар өмір сүруге негіз қалауға бағытталған.
Жалпы алғанда, Қазақстанның Ереван мен Баку арасындағы жақындасу процесіне қосқан үлесі елдің халықаралық қауымдастықтағы сенімді серіктес әрі тиімді делдал ретіндегі рөлін күшейте түсті.
