Қарағанды облысында полицейлер жүргізуші куәлігінен айырылғанына қарамастан, көлік жүргізіп қана қоймай, оған жалған мемлекеттік нөмір таққан Семей қаласының тұрғынын ұстады, — деп хабарлайды Polisia.kz. Оқиға 19 қараша күні таңғы сағат 6 шамасында Жезқазған — Қарағанды тасжолында тіркелген. Облыстық полиция департаментінің патрульдік полиция батальоны жеке құрамы қазіргі уақытта “Қауіпсіз жол” жедел алдын алу іс-шарасы аясында күшейтілген тәртіпте қызмет атқаруда.
Шараның мақсаты – жол қауіпсіздігін қамтамасыз ету, жүргізушілер арасында түсіндіру жұмыстарын жүргізу және жол қозғалысы ережелерінің сақталуын бақылау.Таңғы рейд барысында полиция қызметкерлері A8 көлігін тоқтатып, тексеру кезінде оның 555 WWW мемлекеттік нөмірінің басқа көлікке тіркелгені анықталған. Осылайша жүргізушінің көлігіне жалған нөмір орнатқаны белгілі болды. Бұған қоса, ер адамның бұған дейін жүргізуші куәлігінен айырылғаны белгілі болған. Айта кетейік, биыл жыл басынан бері өңірдің республикалық маңызы бар жолдарында жалған мемлекеттік нөмір таққан 73 жүргізуші және жүргізу құқығынан айырылған 53 азамат анықталып, әкімшілік жауапкершілікке тартылған.
ЖАЛҒАН МЕМЛЕКЕТТІК НӨМІРМЕН ЖҮРГЕН КӨЛІК ЖҮРГІЗУШІСІ ҰСТАЛДЫ
