Оңтүстік мегаполис – Шымкент халықаралық экономикалық диалогтардың маңызды орталығына айналып келеді. Қазақстан мен Ауғанстан арасындағы бизнес-форум дәл осының айғағы.
Қаланың инфрақұрылымдық әлеуеті мен логистикалық мүмкіндіктері екі ел арасындағы сауда ағынын дамытуда шешуші рөл атқарып отыр. Форум аясында сөз алған Ұлттық экономика министрі Серік Жұманғарин бұл бағыттағы нақты көрсеткіштерді атап өтті:
– «Өткен жылы екі ел арасындағы тауар айналымы 545 миллион АҚШ долларын құрады. Ал биылғы сегіз айдың қорытындысы бойынша бұл көрсеткіш 280 миллион долларға жетті. Әсіресе, бидай, мұнай өнімдері және көлік құралдары экспорты айтарлықтай артқан», – деді ол.
Министрдің айтуынша, Ауғанстанға ауыл шаруашылығы өнімдерін жеткізу үшін Бейнеу логистикалық терминалының әлеуетін пайдалану көзделген. Бұл нысан арқылы тауарлар Ауғанстан шекарасына дейін тікелей жеткізілмек.
Сонымен қатар, Шымкент қаласы Кәсіпкерлік және индустриялық-инновациялық даму басқармасының өкілдері ауған инвесторларының өңірдегі индустриялық аймақтарға қызығушылық танытып отырғанын айтты. Қазір тараптар бірлескен кәсіпорындар ашу және өндіріс жобаларын іске асыру бойынша нақты келіссөздер жүргізіп жатыр.
Мамандардың пікірінше, бұл форум Шымкенттің экономикалық әлеуетін жаңа деңгейге көтеріп, қаланы Орталық және Оңтүстік Азия арасындағы маңызды сауда көпіріне айналдыруға жол ашады.
Қазақстанның оңтүстігіндегі ірі мегаполис – Шымкент қаласы еліміздің экономикалық дамуындағы маңызды буындардың бірі болып табылады. Өткен жылдардағы қарқынды өсімі мен стратегиялық орналасуының арқасында Шымкент тек өңірлік деңгейде ғана емес, халықаралық аренада да үлкен ықпалы бар экономикалық орталыққа айналды. Оның әлеуеті мен мүмкіндіктері бүгінгі таңда халықаралық ынтымақтастықтың дамуына серпін беруде.
Алдымен, Шымкенттің географиялық орналасуын атап өту қажет. Қала Орталық Азия мен ТМД елдерінің арасында көпір қызметін атқара отырып, транзиттік қатынастарды дамытуға үлкен мүмкіндік береді. Бұған қосымша, қала мен оның маңайындағы индустриалды аймақтар экспорт-импорт көлемінің өсуіне қолайлы жағдай жасайды. Шымкенттің даму стратегиясында шетелдік инвесторларды тарту және өндірісті модернизациялау басты орын алады, бұл өз кезегінде экономиканың бәсекеге қабілеттілігін арттырады.
ШЫМКЕНТТІҢ ЭКОНОМИКАЛЫҚ ӘЛЕУЕТІ – ХАЛЫҚАРАЛЫҚ ЫНТЫМАҚТАСТЫҚ ОРТАЛЫҒЫ
