ШЫМКЕНТ ҚАЛАСЫНДА ИНЖЕНЕРЛІК ИНФРАҚҰРЫЛЫМДЫ ДАМЫТУ ЖҰМЫСТАРЫ ҚАРҚЫНДЫ ЖҮРГІЗІЛУДЕ. Шымкент қаласының әлеуметтік-экономикалық даму перспективасына сәйкес инженерлік инфрақұрылымды жүйелі түрде нығайту бағытында кешенді жұмыстар жүзеге асырылуда. Қаланың өсу қарқыны мен тұрғындар санының артуын ескере отырып, коммуналдық жүйелердің тұрақты әрі үздіксіз жұмысын қамтамасыз ету негізгі басымдықтардың бірі болып отыр.
Осы мақсатта алдағы кезеңде қала аумағында 6 электр қосалқы станциясы мен 3 газ тарату станциясын салу жоспарланған. Бұл нысандар электр энергиясы мен табиғи газға деген сұранысты толық өтеуге, жаңа тұрғын алаптар мен өндірістік аймақтарды инженерлік желілермен қамтуға мүмкіндік береді. Сонымен қатар, энергетикалық және газ инфрақұрылымының сенімділігін арттырып, апаттық жағдайлардың алдын алуға ықпал етеді.
Жылумен қамту саласында да заманауи технологияларды енгізуге басымдық берілуде. Осы бағытта Шымкент қаласында пилоттық жоба сәтті іске асырылды. Жоба аясында акустикалық резонанс әдісіне негізделген, жасанды интеллект элементтері бар роботтық диагностикалық кешен қолданылды. Аталған технология жылу құбырларының ішкі жағдайын бұзбай анықтауға мүмкіндік береді.
Диагностикалық жұмыстар барысында жалпы ұзындығы 2,3 шақырым болатын жылу желілері зерттелді. Нәтижесінде құбырлардың техникалық жағдайы, тозу деңгейі мен ықтимал ақаулар алдын ала анықталды. Бұл тәсіл апаттардың алдын алып, жөндеу жұмыстарын тиімді жоспарлауға және жылу желілерін пайдалану мерзімін ұзартуға жағдай жасайды.
Аталған пилоттық жобаны жүзеге асыру жылумен қамту жүйесінің сенімділігін арттырып қана қоймай, энергия үнемдеу деңгейін көтеруге және қаржылық шығындарды оңтайландыруға мүмкіндік берді. Алдағы уақытта бұл тәжірибені қаладағы өзге де жылу желілеріне кезең-кезеңімен енгізу жоспарланып отыр.
Жалпы алғанда, инженерлік инфрақұрылымды дамытуға бағытталған бұл жұмыстар Шымкент қаласының тұрақты дамуына, тұрғындардың өмір сүру сапасын жақсартуға және инвестициялық тартымдылығын арттыруға септігін тигізеді.
