Шымкент қаласы Абай аудандық полиция басқармасының инспекторлары қиын өмірлік жағдайға тап болған әйелдер мен балалардың қауіпсіздігін қамтамасыз ету бағытында жүйелі әрі белсенді жұмыс жүргізуде. Негізгі мақсат – тек құқық бұзушылыққа әрекет ету емес, оның алдын алып, көмекке мұқтаж жандарды қорғау.
Ерекше назар отбасылық-тұрмыстық зорлық-зомбылықтың профилактикасына аударылуда. Әйелдермен олардың құқықтары, заңмен көзделген қорғану шаралары және қауіп туындаған жағдайда әрекет ету тәртібі жөнінде түсіндіру жұмыстары жүргізіледі. Полиция қызметкерлері көмекке жүгіну жолдарын, қорғау нұсқамасын шығару тәртібін және құқық бұзушыларды жауапкершілікке тарту шараларын егжей-тегжейлі түсіндіреді.
Бұл бағыттағы жұмыста Отбасын қолдау орталығы маңызды рөл атқарады. Мұнда әйелдер білікті заңгерлер мен психологтардың кәсіби көмегіне жүгіне алады. Заңгерлер құқықтық кеңес беріп, қажетті құжаттарды рәсімдеуге көмектеседі, ал психологтар күйзеліс пен қорқынышты еңсеруге бағытталған қолдау көрсетеді.
Профилактикадан бастап нақты практикалық көмекке дейінгі кешенді тәсіл қауіпсіздікті қамтамасыз етуге, сенімді қалпына келтіруге және отбасы институтын нығайтуға бағытталған. Бұл жұмыс тұрақты негізде жалғасуда.
