Түркістан облысында ер адам сау әйелінің аяқ-қолын матап жындыханаға жатқызған.
18 жыл отасқан әйелін психикалық диспансерге қинап алып барған Ділмұрад Ибрагимов 9 жылға сотталды. Ал оған көмектескен достары 8 жылға сотталды.
Айыптау орнында отырған үшеуі осыдан екі жыл бұрын 35 жастағы әйелді үйінде қамсыз жатқан жерінен, қол-аяғын матап психикалық диспансерге алып келген. Түркістаннан Шымкентке дейін аузы мен аяқ-қолы байланып келген Дияра Ибрагимова сотталушылардың бірінің әйелі. Үйде болған жанжалдан соң отағасы жан-жарын осылай жазаламақ болған екен.
“Қылмыстық құқықбұзушылықтарды жиынтығымен онша қатаң емес жазаны неғұрлым қатаң жазаға ішінара қосу арқылы түпкілікті оған 9 жыл мерзімде бас бостандығынан айыру жазасы тағайындалсын. Жазаны қылмыстық атқару жүйесінің орташа қауіпсіз мекемелерінде өтеу тағайындалсын. Ибрагимовке қолданылған үйқамақ түріндегі бұлтартпау шарасы өзгертіліп, ол дереу сот залынан қамауға алынсын”, – деді Түркістан қаласы ауданаралық сотының судьясы Санжар Қойшыманов.
Әйелін тәртіпке салмақ болған төрт баланың әкесі мен оның достарына прокурор 9 жылдан 10 жылға дейін бас бостандығынан айыру жазасын сұраған екен. Адам ұрлап, оны мәжбүрлеп психикалық диспансерге жатқызған Дияраның күйеуі 9 жылға сотталса, досына көмектесемін деп басы бәлеге қалған екеуі енді 8 жылын түрмеде өткізеді. Үкіммен келіскен келіншек енді орталық дәрігерлерін сотқа беремін деп отыр.
Айта кетейік сотталушы мен жәбірленушінің ортақ 4 баласы бар. Кәмелет жасына толмаған перзенттері қазір Дияраның қарауында. Сот жәбірленушіге моральдық өтем ретінде 11 миллион теңге төлеуді міндеттеді.
