Қазақстанда 2026 жылғы көктемгі егіс науқанына дайындық қызу жүріп жатыр. Биылғы басты мақсат – егіс алқаптарын әртараптандыру және бидай көлемін азайтып, жоғары рентабельді дақылдар үлесін арттыру. Бұл туралы Ауыл шаруашылығы министрі Айдарбек Сапаров Үкімет отырысында мәлімдеді.
Егіс құрылымындағы өзгерістерБиыл еліміздегі жалпы егіс алаңы шамамен 23,8 млн гектарды құрамақ. Бұл өткен жылмен салыстырғанда 180 мың гектарға көп. Министрлік нарықтағы баға ауытқуларына төтеп беру және қайта өңдеу кәсіпорындарын шикізатпен қамту үшін мынадай өзгерістерді бекітті:
Бидай: 125 мың гектарға қысқарып, жалпы көлемі 12,1 млн гектар болады.Азықтық (жемшөп) дақылдар: 242 мың гектарға ұлғаяды.Арпа: 94 мың гектарға көбейеді.Жүгері: 90 мың гектарға артып, 265 мың гектарға жетеді.Майлы дақылдар: 55 мың гектарға қосылады.Картоп: 10,3 мың гектарға ұлғаяды.Қаржыландыру: 700 млрд теңге және ерте несиелеуБиылғы егіс және жиын-терін жұмыстарына мемлекет тарапынан 700 млрд теңге жеңілдетілген кредит бөлу жоспарланған. Министр атап өткендей, қаржыландыру тетігі биыл айтарлықтай ерте іске қосылды.
«2026 жылғы көктемгі дала жұмыстарына өтінімдерді қабылдау өткен жылдың қазан айында басталды. Бүгінгі таңда 1 900-ге жуық фермер 200 млрд теңгеге қаржыландырылды. Бұл — жалпы көлемнің 27%-ы», — деді Айдарбек Сапаров.
Бұған қоса, отандық ауыл шаруашылығы техникасын жеңілдетілген лизингке беру үшін кемінде 300 млрд теңге қарастырылған. Мақсат — техника паркін жаңарту деңгейін 8%-ға жеткізу.
Егіс науқанын сапалы жүргізу үшін фермерлерге 402 мың тонна жеңілдетілген дизель отыны бөлінді. Бұл шаралар егінді уақтылы егіп, өнімділікті арттыруға мүмкіндік бермек.
