Польшада жоғалып кеткен қазақстандық азаматша Екатерина Шилованың мәйіті табылды. Бұл туралы марқұмның әпкесі әлеуметтік желі арқылы хабарлады. Оның айтуынша, әйелдің өліміне қатысы бар деген күдікпен бір адам ұсталған.
Марқұм екі жыл бұрын Талдықорған қаласындағы агенттік арқылы Польша астанасы Варшаваға жұмыс істеуге кеткен. Ол сол жерде кір жуушы болып еңбек еткен. Шетелде жүрген кезінде Екатерина Украинадан келген ерлі-зайыптыдан бөлме жалдап тұрғаны белгілі болды.
Туыстарының айтуынша, әйел 18 ақпан күні Қазақстанға қайтуы тиіс болған. Сол күні ол әуежайға бара жатқанын айтқанымен, содан кейін байланысқа шықпаған. Осыдан кейін жақындары алаңдап, оны іздестіру жұмыстары басталған.
Кейіннен Екатерина Шилованың мәйіті табылғаны белгілі болды. Марқұмның әпкесі күдікті ретінде бір адамның ұсталғанын хабарлады. Қазіргі уақытта Польша полициясы оқиғаның мән-жайын анықтап, тергеу жұмыстарын жүргізіп жатыр.
Сонымен қатар марқұмның отбасы оның денесін Қазақстанға жеткізіп, туған жерінде жерлеу үшін қаражат жинап жатқанын мәлімдеді.
