Олимпиада чемпионы Жақсылық Үшкемпіров өмірден озды

Олимпиада чемпионы Жақсылық Үшкемпіров өмірден озды. Бұл туралы ҚазАқпарат Қазақстан грек-рим, еркін және әйелдер күресі федерациясына сілтеме жасап хабарлайды.

«Грек-рим күресiнен тұңғыш Олимпиада чемпионы, Әлем чемпионы, Қазақстанның еңбек ерi, «Барыс», «Құрмет» «Парасат» ордендерінің иегері Жақсылық Әмiрәлiұлы Үшкемпiров ағамыз бақилық болды. Батыр ағамыздың Мәскеу Олимпиадасындағы ерлігiне биыл 40 жыл болып еді…Марқұмның барлық туған- туыстарына, отбасына, жора-жолдастарына, барша Қазақстан күресiнiң жанкүйерлеріне қайғырып көңіл айтамыз!», – деп жазды Қазақстанның күресі федерациясы парақшасында.

Жақсылық Үшкемпіров 1951 жылы 6 мамырда Қазақ КСР, Жамбыл облысы, Свердловск ауданы, Чапаев кеңшарында дүниеге келген.

Ол грек-рим күресінің палуаны, спорт шебері (1971), Халықаралық спорт шебері (1975), Еңбек сіңірген спорт шебері (1980), алтын медальге иеленген қазақтан шыққан тұңғыш Олимпиада чемпионы (Мәскеу, 1980), Әлем чемпионы (1981), әлем кубогының күміс жүлдегері (1982), екі дүркін Кеңес Одағының чемпионы (1975, 1980), Қазақ КСР еңбек сіңірген жаттықтырушысы.

2019 жылы Жақсылық Үшкемпіровтің өмірі туралы «Жақсылық» көркем фильмі түсірілді. Үшкемпіровтің жасөспірім және бозбала шағын Эльнар Назаркул мен Сануржан Сүлейменов, ал 60 жастағы кезін Досжан Жанботаев ойнады.

Бүгін белгілі болғандай, Жақсылық Үшкемпіровтің жаназасына тек жақын туыстары ғана қатысады деп марқұмның отбасы қазақстандықтарға үндеу жасады.

Олар қазақстандықтарды пандемияға байланысты жаназа шығаруға келмеуін сұрады. Жақсылық Үшкемпіровті ақтық сапарға тек туған-туыстары ғана шығарып салады.

«Қоштасу және еске алу рәсімінің бәрі тура бір жылдан кейін өткізіледі», – деді Үшкемпіровтер әулетінің өкілдері.

 

Желіде бөлісіңіз
Жарияланған

"Әділет.тв" ақпараттық агенттігі

Пікір қалдыру

Э-пошта мекенжайыңыз жарияланбайды. Міндетті өрістер * таңбаланған

Келесі жазба

[:kz]Шымкент: Ынтымақ-2 шағын ауданына ауыз су жүйесі тартылып жатыр[:]

Mon Aug 3 , 2020
Абай ауданы аумағында орналасқан «Ынтымақ»-2 шағын ауданында ауыз су мәселесі өзекті. Мұндағы тұрғындар тіршілік нәрін күні бүгінге дейін сатып алады екен. Бір аптаға 15 мың теңге төлеп сатып ішкен 400 литр су әрең жететін көрінеді. Осыған орай, «Ынтымақ-2» шағын ауданына су құбырын тарту үшін жобалық сметалық құжаттары дайындалып, қала қазынасынан […]