«AMANAT» партиясы және Шымкент қаласы әкімдігінің қолдауымен өткен «Shymkent Half Marathon–2026» марафоны қала өміріндегі маңызды спорттық оқиғалардың біріне айналды. Мемлекет басшысы Қасым-Жомарт Тоқаев жүктеген бұқаралық спортты дамыту және салауатты өмір салтын қалыптастыру міндеттері аясында ұйымдастырылған ауқымды шараға 3 мыңға жуық тұрғын мен қала қонақтары қатысты.
Іс-шараға Мұрат Жолдыхожаев, Дене шынықтыру және спорт басқармасының басшысы Қанат Жолдықараев, сондай-ақ елге танымал тұлғалар – Қайрат Түнтеков, Марат Достаев, «Миллион» жайдарман командасы, спорт саңлақтары Арман Оспанов пен Біржан Жақыпов, мәслихат депутаттары, еріктілер және қала тұрғындары белсенді түрде қатысты.
Марафонның ашылу салтанатында сөз сөйлеген Мұрат Жолдыхожаев бұл бастаманың қоғам үшін маңызын ерекше атап өтті:
«Бүгінгі марафон – тек спорттық жарыс қана емес, бұл – салауатты өмір салтын ұстанатын белсенді қоғам қалыптастыруға бағытталған маңызды қадам. Мемлекет басшысы қойған міндеттерді жүзеге асыру жолында осындай бұқаралық іс-шаралардың рөлі ерекше. Қатысушылардың әрқайсысына сәттілік тілеймін, бастысы – жеңіс емес, белсенділік пен денсаулық!», – деді ол.
Жарыс бағдарламасы барлық жас ерекшеліктерін қамтыды: балалар 500 метр қашықтықта бақ сынаса, ересектер 5, 10 және 21,1 шақырым аралығында жүгірді. Қатысушылардың спорттық әлеуеті 30 жасқа дейін, 40 жасқа дейін, 50 жасқа дейін және 50 жастан жоғары санаттары бойынша бағаланды. Нәтижесінде үздік шыққан спортшылар арнайы алғыс хаттармен, медальдармен және қаржылай сыйлықтармен марапатталды.
Марафонда ерекше көзге түскендердің бірі – 11-сынып оқушысы Рамазан Өскенәлиев. Ол 5 шақырымдық қашықтықты небәрі 17 минутта жүгіріп өтіп, қарсыластарынан оза шауып, жеңімпаз атанды.
«Өте керемет көңіл күйдемін. Бұл марафонға алдын ала тыңғылықты дайындалдым. Бүгін сол еңбегімнің жемісін көріп отырмын. Бұған дейін де қатысқанмын, бірақ бұл – алғашқы жеңісім. Осындай мүмкіндік сыйлаған ұйымдастырушыларға алғысым шексіз», – дейді жас жеңімпаз.
Іс-шара барысында қатысушыларға барлық қажетті жағдай жасалды. Жүгірушілерге су мен жеміс-жидек таратылып, көрермендер мен қатысушыларға көтеріңкі көңіл күй сыйлау мақсатында концерттік бағдарлама ұсынылды. Өнер жұлдыздарының өнер көрсетуі марафонның сәнін арттырып, қатысушыларға ерекше серпін берді.
Жалпы, «Shymkent Half Marathon–2026» – спорт пен салауатты өмір салтын насихаттаудың жарқын үлгісі ғана емес, қоғамды біріктіретін, белсенді өмірге ынталандыратын маңызды алаң екенін тағы бір мәрте дәлелдеді.
