Астанада 500-600 мың теңге жалақыға маман таба алмай жүр. Елордада білікті жүргізушілердің тапшылығының себебін Қалалық көлік жүйелері (CTS) компаниясы түсіндірді, — деп хабарлайды Aspan.info тілшісі.
AdiletTV редакциясының ресми сауалына CTS баспасөз қызметі елорданың автобус парктерінде қазір 1852 жүргізуші жұмыс істейтінін айтты. Бұл ретте қаланың қажеттілігі 2912 адамды құраса, жүргізуші тапшылығы 1060 адамды құрайды.
Тасымалдаушы компания атап өткендей, жүргізушілердің орташа жалақысы 500 мың теңгені құрайды.
«Алайда бұл көрсеткіш авариясыз жұмыс істегені, тұрақты айналым жоспарын орындағаны үшін, сондай-ақ артық жұмыс істегені үшін коэффициенттер түріндегі қосымша үстемеақыларды ескере отырып өсуде.Сыйақыларды есепке алғанда жүргізушілерге төленетін төлем 800 мың теңгеге жетеді. », — деп атап өтті компания.
Компанияның мәліметінше, қазіргі жүргізушілердің орташа жасы 45 жас, бұл алдағы 5-10 жылда жүргізушілердің үлкен тапшылығын көрсетеді.
«Жүргізушілердің жалпы санының 30 пайыздан астамын 50 мен 65 жас аралығындағылар құрайды, ал 25 пен 29 жас аралығындағы жастар 2 пайыздан аз», — делінген хабарламада.
Көлік компаниясының айтуынша, мұндай тапшылықтың қалыптасуына бірнеше себеп бар.
Еңбек жағдайларының қиындығына байланысты кәсіптің төмен тартымдылығы;
«D» санатындағы құқықтарды алу кезіндегі заңнамалық деңгейдегі кедергілер (Жасы мен еңбек өтілі бойынша талаптарды азайту туралы заң жобасы Мәжіліске пысықтауға жіберілді. — Ескерту);
Егін егу және жинау науқаны кезінде жүргізушілердің кетуі;
Жалға берілетін тұрғын үйдің болмауы/қымбаттығы;
Аймақтардағы еңбекақы шарттарын теңестіру.
