Шымкент қаласының коммуналдық инфрақұрылымын жаңғырту және қауіпсіздігін арттыру бағытында тағы бір маңызды қадам жасалды. Қала әкімі Ғабит Сыздықбековке табиғи газдың ағып кетуін қашықтан анықтайтын заманауи ДЛС-АВТО («Пергам») мобильді зертханасы таныстырылды. Бұл – отандық және шетелдік тәжірибеге негізделген, инженерлік желілердің жай-күйін қазусыз және жылдам тексеруге мүмкіндік беретін инновациялық шешім.
Жобаның жалпы құны шамамен 250 миллион теңгені құрады. Қаржыландыру жергілікті бюджет есебінен жүзеге асырылды. Құрал-жабдық Ресейде өндірілген және халықаралық стандарттарға толық сәйкес келеді. Бұл зертхана газ тарату желілерін тексеруге жұмсалатын уақытты қысқартып, адам факторына тәуелділікті азайтады, әрі тәулік бойы үздіксіз жұмыс істеуге қабілетті. Мобильді зертхана лазерлік спектрометрия қағидатына негізделген жоғары дәлдіктегі датчиктермен жабдықталған. Құрылғы метан газының ағып кетуін 60 метрге дейінгі қашықтықтан, тіпті көзге көрінбейтін және қолжетімсіз учаскелерден де анықтай алады. Бұл әдіс дәстүрлі тексеру тәсілдерінен бірнеше есе тиімді, әрі уақыт пен еңбек ресурстарын үнемдейді. Қондырғы бір күнде бірнеше ондаған шақырым газ желісін тексере алады. Жобаны енгізу барысында «ҚазТрансГаз» және қалалық газ таратушы мекемелермен бірлескен жұмыс атқарылды. Қаланың барлық газ инфрақұрылымы кезең-кезеңімен осы зертхана арқылы тексерілетін болады. Жүйе деректерді нақты уақытта жинап, автоматты түрде орталық базада тіркейді. Бұл кез келген ақауды ерте сатысында анықтап, апатты жағдайлардың алдын алуға мүмкіндік береді.
Қала әкімі Ғабит Сыздықбеков таныстырылым барысында бұл технологияны енгізудің маңыздылығын атап өтіп, келешекте осындай жабдықтарды қала аумағындағы басқа да инфрақұрылым салаларында пайдалану қажеттігін жеткізді.
«Біз қала тұрғындарының қауіпсіздігін бірінші орынға қоямыз. Коммуналдық жүйелерді бақылау мен жаңғыртудың заманауи әдістерін енгізу — Шымкенттің тұрақты дамуына ықпал ететін стратегиялық шешім. Бұл жабдықты енгізу апаттардың алдын алуға және қызмет көрсету сапасын арттыруға бағытталған», — деді қала басшысы.
Айта кету керек, Шымкент қаласы елімізде табиғи газдың ағып кетуін қашықтан анықтайтын зертханалық жүйені алғашқылардың бірі болып енгізіп отырған өңірлердің қатарында. Бұл жоба мемлекеттік-жекеменшік әріптестік тетіктерін қолдану арқылы да кеңейтілуі мүмкін. Алдағы уақытта бұл технологияны басқа да облыстар мен мегаполистерде енгізу жоспарланып отыр. Сонымен қатар, өңірде газ инфрақұрылымының цифрландырылуы және деректерді өңдеу жүйелерімен интеграциясы да кезең-кезеңімен жүзеге асырылмақ.
Шымкентте газдың ағуын анықтайтын инновациялық мобильді зертхана таныстырылды
