Түркістанда өңірдегі білім сапасын арттыру, басқару тиімділігін күшейту және білім беру ұйымдарының жұмыс нәтижелерін бағалау мәселелері кеңінен талқыланған жиын өтті.
Маңызды басқосуға облыс әкімінің орынбасары Қанат Қайыпбек, білім саласындағы сапаны қамтамасыз ету департаментінің басшысы Ғалымжан Алматов, облыстық білім басқармасының басшысы Ғалымжан Қалдыкөзұлы, басқармаға қарасты ұйымдар мен аудан, қала білім бөлімдерінің басшылары қатысты.
Жиында аудандық және қалалық білім бөлімдерінің қызмет тиімділігін бағалау бойынша рейтинг қорытындысы қаралды. Бағалау білім сапасы, тәрбие жұмысы, басқару тиімділігі, құқықтық тәртіп, мемлекеттік-жекешелік әріптестік, сервистік қызмет және санитарлық қауіпсіздік көрсеткіштері негізінде жүргізілді. Нәтижесінде кейбір өңірлерде басқару жүйесін жетілдіру қажеттігі анықталды.
Сонымен қатар оқу сауаттылығын арттыру, мектептердегі психологиялық қауіпсіздікті күшейту, қосымша білім беру жүйесін дамыту және колледждердің жұмысын жетілдіру бағыттары талқыланды. «Жұмысшы мамандықтар жылы» аясында техникалық және кәсіптік білім беру ұйымдарының қызметін бағалау мәселесі де қаралды.
Жиын қорытындысында білім бөлімдері мен білім беру ұйымдарының жұмысын рейтинг арқылы бағалау, төмен нәтиже көрсеткен өңірлер бойынша нақты шаралар қабылдау, кадр әлеуетін күшейту және басшылардың жауапкершілігін арттыру жөнінде тапсырмалар берілді.
