Алматыда Қазақстан Республикасы Оқу-ағарту министрлігінің ұйымдастыруымен өткен «Дарынды балаларға – талантты ұстаз» республикалық педагогикалық олимпиадасында Түркістан облысының педагогтары жоғары кәсіби шеберлік танытып, жүлделі орындарды иеленді.
Түркістан қаласындағы «Келешек мектептері» жобасы аясында салынған №32 мектебінің дене шынықтыру пәні мұғалімі Орынбасар Парасат баскетбол ойынын оқытудың инновациялық және авторлық әдіс-тәсілдерін ұсынып, қазылар алқасының жоғары бағасын алды. Нәтижесінде ІІ дәрежелі дипломмен марапатталды.Осы білім ұясының орыс тілі мен әдебиеті пәнінің мұғалімі Тастан Ақниет оқу үдерісіндегі тиімділікті арттыратын «ЛитUNO» атты бірегей үстел ойынын таныстырып, республика бойынша ІІ орынға ие болды.Бұл жетістік – Түркістан облысы әкімдігі мен білім басқармасының өңірдегі педагогтардың кәсіби дамуына, жаңашыл бастамаларына көрсетіп отырған жүйелі қолдауының жарқын көрінісі.Айта кетейік, Түркістан облысында «Келешек мектептері» жобасы арқылы 29 мектеп салынды. Аталған білім ұяларында оқушылар мен ұстаздарға барлық жағдай жасалған.