Мемлекет басшысы Қасым-Жомарт Тоқаев денсаулық сақтау саласындағы кадр тапшылығы мәселесін шешу қажеттігін атап өтті. Оның айтуынша, бұл мәселенің салдарын әсіресе ауылдық елді мекендердің тұрғындары көбірек сезініп отыр.
Президенттің сөзінше, жағдайды жақсарту үшін бастапқы медициналық-санитарлық көмек көрсететін қызметкерлерді қолдау бағдарламасын әзірлеу қажет. Бұл бағытта дәрігерлерге лайықты еңбек жағдайларын жасап, олардың әлеуметтік қорғалуын күшейту маңызды.
«Дәрігерлер мемлекет қамқорлығын сезінуі керек. Олар үшін лайықты жалақы, толық әлеуметтік пакет және жергілікті жерде жұмыс істеуге ынталандыратын тетіктер болуға тиіс», – деді Мемлекет басшысы.
Сонымен қатар Президент денсаулық сақтау инфрақұрылымын жаңғырту мәселесіне де назар аударды. Оның мәліметінше, елімізде пайдалану мерзімі әлдеқашан өтіп кеткен 14 мыңнан астам нысан әлі күнге дейін халыққа қызмет көрсетіп келеді.
Осыған байланысты Үкіметке денсаулық сақтау саласының инфрақұрылымына ауқымды реновация жүргізу, медициналық мекемелердің материалдық-техникалық базасын жаңарту және заманауи талаптарға сай жабдықтау міндеті жүктелді.
Мемлекет басшысы бұл шаралар халыққа көрсетілетін медициналық көмектің сапасы мен қолжетімділігін арттыруға, сондай-ақ сала қызметкерлерінің еңбек жағдайын жақсартуға ықпал ететінін атап өтті.
