Шымкент – Қазақстанның үшінші мегаполисі әрі еліміздің оңтүстігіндегі ірі өнеркәсіптік және экономикалық орталық. Қала өңдеу өнеркәсібі, агроөнеркәсіп, химия, фармацевтика, құрылыс материалдары және жеңіл өнеркәсіп бағыттары бойынша дамып келеді. 2025 жылы Шымкент қаласы өнеркәсіп саласында елеулі табыстарға жетіп, экономикалық өсімді қамтамасыз етуде маңызды рөл атқарды.2025 жылдың қаңтар-наурыз айларында Шымкент қаласында жалпы көлемі 309,5 миллиард теңге болатын өнеркәсіп өнімі өндірілді. Бұл 2024 жылдың сәйкес кезеңімен салыстырғанда 17,9 пайызға жоғары. Өңдеу өнеркәсібінің үлесі өте жоғары — 262,5 миллиард теңгені құрады. Бұл саладағы нақты көлем индексі 120,8 пайызды көрсетіп отыр. Мұндай өсім қаланың индустриалды даму қарқынының үдемелі екенін дәлелдейді.Өңдеу өнеркәсібінің ішінде ең үлкен өсім келесі салаларда байқалды: машина жасау саласында өндіріс көлемі 3,2 есеге, жиһаз өндірісі — 2,3 есеге, резеңке және пластмасса өнімдері — 43,9 пайызға, металл бұйымдары — 69 пайызға, тамақ өнімдері өндірісі — 28,6 пайызға өсті. Бұл көрсеткіштер кәсіпорындардың заманауи технологияларды енгізуі мен мемлекеттік қолдау шараларының нәтижесі болып табылады. Қаланың өнеркәсіптік инфрақұрылымы да даму үстінде. Қазіргі таңда Шымкентте 7 өнеркәсіптік аймақ жұмыс істейді. Олардың жалпы аумағы 1276 гектарды құрайды. Бұл аймақтарда жалпы құны 646 миллиард теңгеден асатын 430 жоба іске асырылуда. Бұл жобалар арқылы 8500-ден астам тұрақты жұмыс орны құрылды. Атап айтқанда, «Жұлдыз» индустриалды аймағында 306 гектар жерде 35 өндірістік жоба, ал «Бозарық» агро-индустриалды аймағында 132 гектар жерге 8 азық-түлік бағытындағы жоба орналастырылған. 2025 жылы қала әкімдігі мен кәсіпкерлер арасындағы әріптестік аясында Шымкентте өңдеу өнеркәсібін дамытуға бағытталған 219 инвестициялық жоба қолға алынды. Олардың жалпы құны 1,7 триллион теңгені құрайды. Бұл жобалар толық іске қосылған жағдайда, қалада қосымша 31 мың жаңа жұмыс орны ашылады деп жоспарлануда. Мұндай жобалар қаланың индустриалды әлеуетін арттырумен қатар, өңірлік бәсекеге қабілеттілігін де күшейтеді. Шағын және орта кәсіпкерлік субъектілері де өнеркәсіп саласында белсенді жұмыс атқаруда. 2025 жылы олар арқылы өндірілген өнеркәсіп өнімі көлемі бірнеше есеге өсіп, жалпы көрсеткіштің елеулі бөлігін қамтамасыз етті. Мемлекеттік бағдарламалар аясында кәсіпкерлерге қаржылай және инфрақұрылымдық қолдау көрсетіліп, өндірістік қуаттарды арттыруға мүмкіндік берілді. Шымкент қаласының өнеркәсіп секторындағы даму үрдісі еліміздің басқа өңірлеріне үлгі бола алады. Өңірдің табиғи-экономикалық әлеуеті, көлік-логистикалық қолайлылығы және еңбек ресурстарының молдығы – өнеркәсіптің үдемелі өсуіне себепші болып отыр.
Қорытындылай келе, 2025 жылы Шымкент қаласының өнеркәсіп саласы қарқынды дамығанын сенімді түрде айтуға болады. Өндіріс көлемінің артуы, жаңа жобалардың іске қосылуы, инвестициялық белсенділіктің өсуі және жұмыс орындарының көбеюі қаланың экономикалық көрсеткіштерін жаңа деңгейге шығарды. Бұл өзгерістер алдағы жылдары Шымкенттің еліміздің өндірістік картасындағы маңызын арттыра түспек.
Өнеркәсіп – экономиканың басты тірегі!
