Қазақстанда өткен республикалық референдумға ел азаматтары белсенді қатысып, дауыс беруге құқығы бар тұрғындардың басым бөлігі өз таңдауын жасады. Алдын ала мәліметтерге сәйкес, референдумға 9 миллионнан аса адам қатысып, жалпы сайлаушылардың 75,3 пайызы дауыс берген.
Референдум нәтижесіне қатысты алғашқы Exit poll қорытындылары да жарияланды. Еуразиялық интеграция институты жүргізген сауалнама нәтижесіне сәйкес, респонденттердің 86,7 пайызы “Иә, қабылдаймын” деп жауап беріп, жаңа Конституцияны қолдайтынын білдірген. Ал қалған қатысушылар өзгерістерге қарсы дауыс берген немесе нақты жауап бермеген.
Exit poll зерттеуі еліміздің әртүрлі өңірлеріндегі 200 референдум учаскесінде ұйымдастырылды. Сауалнамаға жалпы саны 30 мың респондент қатысып, олардың пікірлері анонимді түрде тіркелген. Мұндай зерттеу тәсілі дауыс беру нәтижелерінің алдын ала қоғамдық көрінісін анықтауға мүмкіндік береді.
Сарапшылардың пікірінше, референдумға қатысу деңгейінің жоғары болуы азаматтардың елдегі саяси өзгерістер мен реформаларға бейжай қарамайтынын көрсетеді. Сонымен қатар, Exit poll нәтижелері қоғамның жаңа конституциялық өзгерістерге айтарлықтай қолдау білдіргенін аңғартады.
Айта кетейік, Exit poll қорытындылары тек алдын ала дерек болып саналады. Референдумның ресми нәтижелері барлық бюллетеньдер толық саналғаннан кейін тиісті мемлекеттік органдар тарапынан жарияланады.
