Астана қаласында ҚР Ұлттық музейінде «Отырар-Түркістан: ортағасырлық ирригация және егіншілік мәдениеті» атты республикалық бірлескен көрмесінің ашылуы өтті. Көрме ғалымдар, мәдениет саласының өкілдері, зиялы қауым, БАҚ өкілдері мен жастардың басын қосты.
Көрмені «Отырар» мемлекеттік археологиялық музей-қорығы, «Әзірет Сұлтан» ұлттық тарихи-мәдени музей-қорығы және Қазақстан Республикасының Ұлттық музейі бірлесіп ұйымдастырды. Іс-шараны ҚР Ұлттық музейі директорының орынбасары Ақмарал Ибраева ашып, көрменің маңызы жөнінде пікір білдірді.
Іс-шараға «Әзірет Сұлтан» Ұлттық тарихи-мәдени музей-қорығы директорының орынбасары Мұрат Тастанбеков, «Отырар» мемлекеттік археологиялық музей-қорығының директоры Айбек Жандосов пен музей ардагері Рахия Жүзбаева қатысты. Олар Отырар-Түркістан өңіріндегі егіншілік пен суармалы шаруашылықтың тарихи маңызына тоқталды.
Көрмеде археологиялық зерттеулер нәтижесінде табылған су арналары, арықтар мен каналдар, егіншілік құралдары, астық өңдеу бұйымдары және өзге де құнды жәдігерлер ұсынылды. Көрмеге келушілер экспозиция арқылы ортағасырлық тұрғындардың шаруашылық мәдениеті, су пайдалану тәжірибесі және өңірдің мәдени-экономикалық даму ерекшеліктерімен танысты.
Көрме 9 қарашаға дейін ҚР Ұлттық музейінде жалғасады. Баршаңызды тарихи мұрамен танысуға шақырамыз!
