SCAT Airlines әуе компаниясы америкалық Boeing корпорациясымен стратегиялық ынтымақтастықты кеңейтуді жоспарлап отыр. Бұл туралы компания өкілдері мәлімдеді.
Жоспарға сәйкес, әріптестік бірнеше бағытта дамытылады. Біріншіден, SCAT әуе паркін жаңарту және кеңейту мақсатында қосымша жолаушылар ұшақтарын сатып алуды көздейді. Бұл ішкі және халықаралық рейстер санын арттыруға, сондай-ақ әуе тасымалының қолжетімділігін жақсартуға мүмкіндік береді.
Екіншіден, Шымкент әуежайы базасында Boeing ұшақтарына техникалық қызмет көрсету және жөндеу (MRO) бойынша заманауи орталық ашу мүмкіндігі қарастырылуда. Аталған жоба жүзеге асқан жағдайда, бұл Қазақстандағы осындай форматтағы алғашқы орталық болмақ.
Жаңа нысан Boeing компаниясының тікелей технологиялық қолдауымен іске асырылмақ. Бұл орталықта инженерлік-техникалық персонал арнайы дайындықтан өтіп, халықаралық стандарттарға сай қызмет көрсетеді деп күтілуде.
Сарапшылардың пікірінше, жобаның іске қосылуы Шымкент қаласының авиациялық хаб ретіндегі әлеуетін арттырып, жаңа жұмыс орындарын ашуға және отандық авиация саласының дамуына серпін беруі мүмкін.
Қазіргі уақытта тараптар техникалық-экономикалық негіздеме әзірлеу және жобаны кезең-кезеңімен іске асыру мәселелерін пысықтап жатыр.
