Елордада мал иелерін мал ұрлығынан, ал қала тұрғындарын сапасыз ет өнімдерінен қорғау мақсатында “Мал ұрлығы” республикалық жедел-алдын алу іс-шарасы өтуде, — деп хабарлайды Polisia.kz. Іс-шара барысында полиция қызметкерлері ветеринарлық инспекциямен бірлесіп, заңсыз жұмыс істеп келген жасырын ет өңдеу цехын анықтады.
Тергеу барысында еттің өрескел антисанитариялық жағдайда, ветеринарлық-санитарлық нормалар мен талаптарды сақтамай өңделгені белгілі болды. Сондай-ақ ұйымдастырушыларда қажетті рұқсат құжаттары мен ветеринарлық анықтамалар болмаған. Тексеру нәтижесінде 5 жылқының, 24 ірі қараның және 13 ұсақ малдың тұтас еті, сондай-ақ ет өңдеуге арналған арнайы құрал-жабдықтар мен аспаптар табылды. Бұған қоса, 180 қап дайын ет өнімі тәркіленді. Аталған факті бойынша ауыл шаруашылығы жануарларын сәйкестендіру базасы бойынша тексеру жүргізілуде. Мал мен ет өнімдерінің шығу тегі анықталуда, оның ішінде олардың ұрланған-ұрланбағаны да тексерілуде.
ЗАҢСЫЗ ЖҰМЫС ІСТЕГЕН ЦЕХТАН 180 ҚАП ЕТ ТӘРКІЛЕНДІ
