Сауд АрабияСЫН су басты. Төпелеп жауған жаңбырдан бірнеше өңірде көшелер көлге айналды. Олардың ішінде ел астанасы Әр-Рияд пен қасиетті Медина қаласы да бар.
Табиғи апатқа байланысты бірқатар провинцияда қауіптің қызыл деңгейі жарияланған. Балабақшалар мен мектептер жұмыс істемейді.
Жергілікті метеорологиялық қызмет өкілдерінің хабарлауынша, елдің біраз бөлігінде екпінді жел мен нөсер әлі де сақталады.
Сауд Арабиясы Парсы шығанағында тасқыннан зардап шеккен жалғыз мемлекет емес. Өткен айда Оманда топан судан 21 адам, Біріккен Араб Әмірліктерінде 4 азамат опат болды.
